ผาวิ่งจู๊
ดอยเต่าเหนือเขื่อนยันฮี
- ดอยเต่าเหนือเขื่อนยันฮี
- ได้หนีน้ำท่วมแต๊น่อ
- ปี้น้องบ้านนาบ้านก้อ
- ได้หนีละบ้าน ละจอง
- วังลุง บ้านนา คอเฮือ
- ต้าเดื่อ บ้านจ้างบ้านหนอง
- พ่องไปอยู่แม่ฮ่องสอน
- พ่องล่องไปจังหวัดตาก
- หนีน้ำไปอยู่สามเงา
- แม่สอดแม่ละเมาละมาด
- ดอยเต่าเป๋นทะเลสาบ
- น้ำหลากไหลเยิ้ง ขึ้นมา
- พ่องไปเจียงแสนเจียงฮาย
- แม่สายเหนือสุดแต๊หนา
- บางพ่องเป๋นห่วงไฮ่นา
- อยู่บ้านจัดสรร ดอยเต่า
- พ่องเป็นเศรษฐีมีเงิน
- ดอยเต่าเจริญเหลือเก่า
- พ่องได้ปาลูกปาเต้า
- แวะแอ่วดอยเต่าเรือนแพ
- มาพักมาค้างนอนแรม
- ยามแลงผ่อเขาทอดแห
- ความสุขสวรรค์เรือนแพ
- จัดทัวร์ล่องแพเป๋นหมู่
- นั่งเฮือชมสายธารา
- แล้วไปแอ่วผาวิ่งจู้
- ยังมีหลักฐานเล่าสู่
- เรื่องผาวิ่งจู้ ฮิมปิง
- หนุ่มไพร่จื่อว่านายน้อย
- ตุ๊กยากต่ำต้อยทรัพย์สิน
- ฮักไคร่ชอบพอเจ้าหญิง
- ดอกเอื้องหรือเจ้า นางแอ่น
- นายน้อยเป๋นสามัญชน
- จิตใจ๋ซื่อตรงหนักแน่น
- พยาเจ้าเมืองโกรธแค้น
- หื้อหนุ่มไพร่ฟ้าสามัญ
- บ่มียศฐายรรดาศักดิ์
- ความฮักเลยโดนกีดกั๋น
- ถ้าหากนายน้อยบ่ฟัง
- จะจับลงขัน ฮับโต๊ด
- พระธิดาระทมหัวใจ๋
- แสนอาลัยเศร้าโศก
- พระยาเจ้าเมืองกริ้วโกรธ
- สั่งห้ามเจ้าหญิงธิดา
- กักขังอยู่บนปราสาท
- เสนาอัมมาตฮักษา
- นายน้อยกับพระธิดา
- ห้ามพบไปมา หาสู่
- เจ็บดั่งศรพิษปิดทรวง
- ฤทัยรันจวนหดหู่
- คิดถึงนายน้อยจายจู้
- บ่เป๋นอันกิ๋นอันนอน
- พวกนางสนมไพร่ฟ้า
- หันพระธิดาหม่นหมอง
- ลักไข๋กุ๋ญแจ๋ห้องนอน
- ปี้เลี้ยงจ่วยกั๋นลักปล่อย
- เดิกดื่นค่ำคืนราตรี
- ลักหนีไปหานายน้อย
- จะหนีเข้าป่าดงดอย
- ได้ควบหลังอาชนัย
- สองคนหนีออกเมืองลี้
- ลัดป่าพงพรีหนีต๋าย
- สองคนอกสั่นขวัญหาย
- จับได้คงต๋าย คอขาด
- องค์พระราชบิดา
- ฮู้ข่าวแล้วทรงเกรี้ยวกราด
- ได้สังเสนาอัมมาต
- ยกทัพติดต๋ามสองคน
- ทหารควบม้าไล่ล่า
- ดังเหมือนห่าฟ้าห่าฝน
- จ๋นตรอกหน้าผาวังมน
- หน้ากั๋วบ่มี หยังเต้า
- จะย้อยปิ้กคืนกลับหลัง
- คงเจอตะหารแต้เล่า
- บ่มีอะหยังใหญ่เต้า
- ความฮักสองเฮาหนอนาย
- เจ้าหญิงโดดลงหลังม้า
- วันนี้ตั๋วข้ายอมต๋าย
- เลยดึงเอาผ้าสะไบ
- สีแดงตี้เกยปาดบ่า
- เอาผ้าสะไบสีแดง
- จัดแจ๋งแล้วปิดต๋าม้า
- เจ้าหญิงเป๋นผู้ใจ๋กล้า
- บังคับหลังอาชนัย
- ฮักแต้ชั่วนิจนิรันดร์
- พนันกั๋นด้วยหัวใจ๋
- ม้าโดดหน้าผาเร็วไว
- ก่อเลยได้ต๋ายตึงกู้
- โดดลงแม่น้ำคงคา
- เลยฮ้องว่าผาวิ่งจู้
- ศพลอยขึ้นมาตึงกู้
- ได้ต๋ายตึงม้าอาชา
- ส่วนศพเจ้าหญิงนางแอ่น
- ไปติดฮากไม้หินผา
- ไปขำซื่อฮั้นแต้กา
- ก่เลยจื่อว่า บ้านแอ่น
- แก่งจ๊างฮ้องและวังหัวควาย
- น้ำไหลบ่มีเฮือดแห้ง
- ศพนายน้อยไหล
- ไปติดแจ่ง
- ศพโผ่วเขินขึ้นวนลอย
- เปิ้นเลย
- ใส่จื่อบ้านบ่
- ไจ่ขี้อู้ขี้ข๋อย
- บ่เจื่อลองไปแอ่วกอย
- จื่อว่าบ้านน้อยดอยเต่า
- เจิญจวนท่านมาล่องแป
- กิ๋นส้มป๋าแคป๋าค้าว
- ข้างตางเปิ้นขายบะเต๊า
- บะนาวบะม่วง ลำไย
- ไปแล้วบ่มีวันลืม
- ซาบซึ้งตราตรึงหัวไจ๋
- ถ้าหากว่ารวยวันได
- จะซื้อสวนลำไย ดอยเต่า
Comments 3
💗 👨🎤😚😚😚😚🙌
ขอบคุณมากๆคร้า
โอ้ เก่ง จัง🤟❤🤟❤